Euskaldunontzat bereziki sentikorra den gai komunikatibo baten inguruan hitz egin nahi dizut gaur: hizkuntzak banderatxoen ikurren bidez adieraztea.
Bai komunikazio euskarri fisiko zein digitaletan hizkuntza ezberdinak multzokatzeko beharra suertatzen da askotan. Webguneen hastapenetan, adibidez, asko hedatu zen praktika, azkenaldian gure inguruan behintzat gutxitzen ari da. Baina hausnartu al duzu inoiz hizkuntza bat herrialde baten banderatxoarekin lotzeak atzean daukan mezuaren inguruan?
Hurrengo adibideak gaian gehiago sakontzen lagunduko digu.
Hendaiako herriko etxearen webgunean Frantziako banderak webgunearen frantsesezko bertsiora garamatza eta, aldiz, ikurrinak euskarazkora. Uler genezake, beraz, frantsesa Frantziako hizkuntza dela (bat eta bakarra) eta euskara Euskal Herrikoa edo EAEkoa, bakoitzak ulertu nahi duenaren arabera. Frantziako banderatxoan soilik zentratuz, kanpo geratuko lirateke Frantziako Kultura Ministerioak bere webgunean harrotasun osoz aipatzen dituen beste 75 hizkuntza. Hendaiak hartutako irizpidea Frantziak idioma nazional bakar bat izatearekin justifikatu dezake baten batek.
Hizkuntzak, nazioak eta herrialdeen arteko mugak gai hain gatazkatsuak izanik, askotariko sentimendu eta errealitate hartu beharko genituzke kontuan, komunikaziorako kode gisa funtzionatu beharko lukeen elementu bat ez dadin irain bilakatu.
Erantzun zaileko galdera asko datozkit burura:
- Gaztelania Espainiako banderarekin lotzen bada, zer sentituko dute Espainian bizi diren hegoamerikarrek?
- Zein banderatxo erabiliko dugu hainbat herrialdetan zehar bizi diren lurralde afrikarretako herri zaharrena den berbereen hizkuntza adierazteko?
- Zer egingo dugu Suitza bezalako herrialdeekin, non hizkuntza ofizial bat baino gehiago dauden aitortuta?
- Zein banderatxo erabiliko dugu ingelesa irudikatzeko, Ingalaterrakoa, Erresuma Batukoa edo Estatu Batuetakoa?
- Zer egingo dugu naziorik gabeko hizkuntzekin?
Bistan denez, hautu politiko bat da afera honen inguruan zein irizpide hartzen dugun kontuan. Guk, gurean, argi dugu: ez ditugu inolaz ere banderatxoak erabiltzen eta hizkuntzak bere izenez izendatzen ditugu euskarri grafiko zein digitaletan.
Gaiaren inguruan interesa izanez gero, erreferentzia hauetan gehiago sakondu dezakezu:
- Flags are not languages bloga (ingelesez).
- Indicating language choice: flags, text, both, neither? artikulua (ingelesez).
Irudia: Marc Ruaix