Emozioak eta diseinua erabat lotuta daudela ohartu gaitezke eguneroko gure ekintza txikiei erreparatzen badiegu. Adibidez, produktu moeta bat erostean (agian haurtzaroa gogorarazi diezagukelako), denda batean bestean baino erosoago sentitzean, usain konkretu bat leku batekin lotzean, talde zehatz baten baloreak adierazten duen diseinua erostean…
Irudi batek mila hitzek baino gehiago adierazi dezakela esan ohi da, baina emozioek osotasuna adierazi dezakete. Diotenez, eroso eta ondo sentitzen garenean proaktiboagoak bilakatzen gara eta errazago kontsumitzen dugu dena delako hori. Ondoriozta genezake beraz produktu edo diseinu baten atzean zerbait gehiago ere badagoela, eta irudiarekin hunkitzea izan liteke beraz merkatuko baliabiderik indartsuena, pertsonen oroimenean egoteko, «dena esan, egin eta kontsumitu den garaian».
Emozio bat diseinatu daiteke ordea?
Diseinua soilik egitea ez litzateke hain zaila, baina bai emozioak diseinatzea. Hori lortutakoan, enpresen eta kontsumitzaileen arteko lotura sendoak sortu, eta erabiltzailearen «leialtasuna» lor daitekeela diote. Arrazoia: bere esperientzia ez da asebetetzen lehiakideen beste edozein produktu erabili edo eskuratzearekin, baizik eta «produktu honekin soilik jasotzeko gai garen emozio horiekin». Estrategia bat izan daiteke beraz.
Diseinu emozionalarekin zuzenean hitz egin diezaiekegu pertsonei, eta modu pertsonalizatuagoan sartu gaitezke, pertsonen memoria emozionalaren alderdirik intimoenekin konektatuaz. Horretarako diseinu emozionalek batez ere behar bat asetzean, kontsumitzaileengan eragin positiboa sortzea dute helburu. Erraz, modu dibertigarri eta erabiltzeko edo erosteko errazak direlarik. Zoriontasuna diseinatu daiteke?
Bizi egiten ditugu
Diseinu emozionalak «harrapatzen» bait gaitu, gure sistema kognitiboa estimulatu eta sentiarazi egiten digu. Eragiten dituzten sentsazio eta emozioak, fisikoak nahiz psikologikoak, laburrak izan ohi dira orohar, baina bizi egiten ditugu. Hala, marka edo produktua erabiltzen jarraitu beharra sentitzen dugu, erlazio iraunkorrak eta ordezkaezinak ezarri arte. Marka emozionalak kontsumitzaileen bizitzaren eta oroitzapenen parte izango dira, eta erabiltzaileen artean «belaunaldiz belaunaldi» transmitituz joan daitezke.
Saltzeko, denak balio du?
Argi ikusten da, nola, merkatuan ditugun marka handiek ahalegin guztiak egiten dituztela diseinu, publizitate eta marketin-mota honetan, badakitelako konfidantzazko lotura hau ez dela goizetik gauera sortzen. Eta sekulako lanak ikusten ari gara.
Modu honetan gure alaitasuna eta ongizatea produktu edo diseinu konkretu horrekin lotzeko joera indartzen jarraitzen dugu.
Haize boladek xuxurlatzen dute ordea, alaitasuna eta ongizatea norberak bere baitan omen duela. Zuk hala uste duzu?
…jarraituko dugu, II. kap. 😉